خلك ابصدك وارجو لا تعود
عزتي بنفسي تطلب الابتعاد
تبقى لي ذكرى ولا إلها شهود
غير ذاك الوقت وحبٍ كان باد
كنت لي حلمٍ على احلامي تسود
كنت لي اقصى طموحي وامتداد
كنت لي غنوه اغنيها بشرود
ان سرحت القاك بالحاني تعاد
عاشقك عشقٍ من اعماقي يجود
كنه الطائي كرم ظيفه وجاد
كل هذا لك من قلبٍ ودود
حافظٍ للعهد وهذا هو المراد
ما لقيت الا صدودك والجحود
عقربك سمه على هالروح باد
خلك ابصدك ولا ارجو تعود
عزتي بنفسي تطلب الابتعاد
الومك أو الوم اشواق عيني؟
تركتك يوم ولا عني تسال
تراني في الهوى الله يعيني
ولا لي في لقاء حسنك مجال
ألومك أو ألوم اشواق عيني؟
جوابك لي ترده بلا إحتمال
ترفق يالغضي بالحال فيني
وعبر لي وجاوب لي السؤوال
انا ودي عليك اسأل
وخايف من خفي احساس
يخالط كل مافيني
ويفضح سر مكوني
انا ودي اعبر لك
مدى شوقي وحر الياس
ياغير الناس من حولك
تراهم عنك يصدوني
حبيبي لا تصدقهم
تراني مغرم وحساس
ولا ياتي على بالك
كلام الحاسد الدوني
انا دونك نجم تايه
على هالكون مالي ساس
ابي فلكك ابي ابقى
وكونك يستوي كوني
انا جيتك اعبر لك
قبل لا تنتهي الانفاس
اسابق عد نبضاتي
بلهفة شوقي وجنوني
ابي ابقى معك دايم
ولو اسمٍ على كراس
عساها حروفي اتشدك
ياتي فذكرك شجوني
تمت
الا يا من تزاحم فيه همه
ولانالة عيونه طيب نومه
تشرب مالعشق لي حار سمه
وضاق المر لي بانت علومه
ويا بو عبيد همك استهمه
وانا مثلك اعاني الحب دومه
كواني كي باسم الحب واسمه
كواني صاحبي ولا فيه لومه
احبه حب وليتي كنت دمه
اعيش بدنيته لي يحين يومه
وهذا السر يا إبن العم ضمه
عن الواشي ونفسك بي كتومه
تصبر والصبر لو زاد غمه
نصيحه من هوى نفسٍ حلومه
سالم عبيد الكعبي
الوقت يمضي والعمر محطات
والناس تبقى على ماهي تجيبه
كلٍ على حظه اذا الوقت فات
أحدٍ سبقه الوقت و أحدٍ يصيبه
وانا من افكاري ضايع بالاشتات
يا كم ودي هالبخت اعتنيبه
مره سبقت القوم فايز بالاصوات
ومره خذلت الحال وامست عطيبه
مره كسبت السعد واعلى الشهادات
ومره خذاني الليل رحله كئيبه
كنه العمر يمشى وسط الاشارات
ودروب منها في الشوارع مريبه
واجمل طرق ضجت بالمطبات
كلٍ على هالحال ماخذ نصيبه
الوقت يمضي والعمر محطات
والناس تبقى على ماهي تجيبه
سالم عبيد الكعبي
كل ما قلب ملفات القصيد
ذكرني بالغرام الاولي
ذكرني ذاك وقتي السعيد
يوم خلي بالمحبه يازلي
ليت عمري لي مضالي يستعيد
السعاده والشعور المخملي
غير حظي بالتعنت العنيد
ساق لي من جور وقته ساق لي
شاب حالي والامل باين بعيد
والوضع ميؤس منه يا علي
ما بقى لي غير طيفه والنشيد
في حظوره اهتنيبه واختلي
سالم عبيد الكعبي
ماني على الفراق راضي
ولاني على الوصال مجبور
كلن تراجع بالتراضي
الا قليبي منك مقهور
دامك اناني وانت قاضي
حكمك قضيته بجورٍ وزور
سيفك على الفواد ماضي
باسباب حبك منك منحور
عليك ربي ف يوم لاضي
تبقى مع الظلام محشور
راضي عليك وغير راضي
لك يوم ياتي وتاخذ الدور
سالم عبيد الكعبي
محلى نسيم بلادي
روحي عليها تطيب
جوها عليل وهادي
حرها دفا بتهذيب
من شمسها معتادي
لو غيري له تعذيب
ما عافها الفوادي
وان طال بي المشيب
الا يا حارمين النوم عيني
دخيل الله ردو النوم ساعه
انا من حالتي الله يعيني
فقير الحظ مالي استطاعه
اسامر وحدتي واحسب ونيني
وعد ايام عمري في التياعه
انا لّي قبلكم صلف ومكيني
وكلي في الملا ند و شجاعه
ولا لي في حشى قلبي سكيني
اشوف الريم واقنص في براعه
واذا من بعدكم حالي مهيني
خسر هالقلب روحه في صراعه
ترى ذا الحال ما يرضاه ديني
وشرع الله يامر بالشفاعه
ترحم واتجي الرب فيني
مريض بحبكم مالي مناعه
سهرني البال وارق نوم عيني
دخيل الشوق ساعه منك ساعه
انا من حالتي الله يعيني
فقير الحظ مالي استطاعه
تمت
سالم عبيد الكعبي
يردني لي رد غيري من سنين
الشعور يلي على قلبى طرى
يردني عزي وانا احب الثمين
ما رخصت بيوم لو غيري شرى
ابتعد شامخ وانا بحالي مكين
واعتلى قمة قناعاتي وأرى
كل ما زاد اشتياقي والحنين
غير رب الناس حالي به درى
والالم لو زاد قلت الله يعين
عالجرح صابر وجرحي ما برى
حالتي حال المكابر عالونين
حابس العبرات ودمعي كد جرى
ارتجي المولى بيومي كل حين
يستر الخافي يغفر ما جرى
عن حسود الناس وكيد السامعين
عن كثير القول وجاهل ما قرأ
أبيات مبعثره 