انا مثلك اقول الحب قاسي
و وافق كل ما قلته وزيد
ترى هالحب يبغيله مراسي
و قلبٍ في الهوى دايم عنيد
واذا انك شاربٍ مالمر كاسي
تراه الاسقام مع حبٍ تزيد
شعورٍ قاسيٍ سمه غلاسي
يتعب راعي الباس الشديد
وانا الي مبتلي من قم راسي
عرفت الحب ومالي به عظيد
يجنبي خطيرات المآسي
ويثيب الروح بالقول السديد
تحذر وانتبه ان كنت ناسي
تذكر وقتك الماضي السعيد
بلا عشقٍ يوردك انتكاسي
بلا شوقٍ لميعادٍ بعيد
انا عشته وشفت الحب قاسي
و ردد كل ما قلته وزيد
سالم عبيد الكعبي✒️
مدري احسك مالبعد لي تغيرت
منت الذي كنت عاشقي ذاك لوّل
وين الغلا وين الوفاء إن تذكرت
وين العهد لي بيننا هو تحوّل
العمر يمضي وانا عمري لك احضرت
فدوى لعيونك لو عذابي يطوّل
مدري احسك من خفوقي تحررت
ولا انا من حالة الضيج أهوّل
سالم عبيد الكعبي✒️
اصبحت في حيره وانا تحريت
إني من افكاري قمت وتحررت
الفكر في دنيا وانا في هالبيت
ابحث عن احساسي و تبعثرت
ان جيت بكتب لي شعرٍ وغنيت
تبرز لي طيوفك كنك لها امرت
تجبرني بلحظه سكوت وانا صيت
بين القوافي حس ماني من الصمت
اصبحت في حيره وانا تحريت
إني من افكاري قمت وتحررت
منك السبب يلي عايش ولا ميت
في وسط روحي بي قمت واثرت
سالم عبيد الكعبي
وش عاد تنفع كثر الاعذار
وان كان عذرك دوم مقبول
الروح تشعل وسطها النار
والنفس شفقى وحزنها يطول
تدري بغيابك عني وش صار ؟
وانت الذي للقلب مسؤول
خليت فيني جرح تذكار
من حر ما به ليته يزول
صرح الموده طاح ونهار
وضع الاماني بات مجهول
وش عاد تنفع منك الاعذار
لو هو لعذرك شي معقول
سالم عبيد الكعبي
مفتي الحب قلي
كيف عنه اتوب
عن حبيبٍ سلبني
شوف عيني وغاب
تاركني بحسره
وبحياتي لعوب
مادرى بلي فيني
ساقيني العذاب
مفتي الحب دعوه
من جنابك تنوب
ياعسى ترتقيله
لي بعالي السحاب
يرحم يلي لقلبه
مكتسب له ذنوب
ولغرامه تبلى
ذنبه يوم الحساب
سالم عبيد الكعبي
اذا عني .. ترى بالبعد راضي
مدام البعد في منهجك عادي
تشوف الناس في عينك سوايا
وانا مالناس من هاليوم غادي
حسبت انك معي بالحب تكبر
يا غير انك كبرت بشي سادي
حسبت انك معي اجمل حكايه
تنور دنيتي بعد السوادي
حياتي و وقتها يا كم عطيتك!
ولبي كل ما صوبي تنادي
واداري خايف ن في يوم تزعل
وزعلك لو بدى كله تمادي
عشان الود والمعروف يبقى
اهون خاطري والموت بادي
اعاتب خافقي لو حب غيرك
واثرني عايش ن في غير وادي
والوم لايمي ان قال هده
تصبر واحتسب والله رادي
مصير الوقت في حالي يغير
وحال الصيف يتبعه البرادي
وتبقى للامل عندي طيوفك
تنسي خافقي طول البعادي
وداع الله يامن عشت حبه
على فرق السنين والشيب بادي
سالم عبيد الكعبي
ابشرك بني باجي على خير
بالحال راضي والنوايا سويه
وابشرك بني نسيت المخاسير
ما عاد ترجع في حياتي بقيه
العمر يمضي والمواقف دواوير
ويلي بذلته في جداكم هديه
حتى الشعور يلي بها اشعاري اتسير
يفداك شعري وما بقى منّه عطيه
ابشرك دربي مع احزاني اسارير
وعزوم قلبي في بعادك قويه
دام الذي بالكون ماشي بتدبير
والرب عنده من حياتي دريه
راضي بحكمه الله، كاتب لي خير
والخير شوفك في حياتٍ هنيه
ابشرك بني باجي على خير
بالحال راضي والنوايا سويه
سالم عبيد الكعبي
ما توقف الدنيا على شي مرغوب
ان كان غالي ترى دوم غالي
أَصبر على ماصار والشي مكتوب
امر العزيز يلي عليه اتكالي
لي نفس تهوى في ملاجاه وذوب
والروح تبغي من عليها يسالي
والضيم حصه في حشى القلب وينوب
كل ما طرى في القلب فاق احتمالي
اهواه واعشقه وابغيه بالدوب
ياتي على كيفه عمري وحالي
بيني وبينه مسافات ودروب
يا عسى في خير حالٍ ومالي
ادعيه ربي والرجاء فيه مطلوب
كل ما سجد راسي له عظيم التعالي
يحفظ غرام القلب من كل منكوب
ويعيش تالي الوقت راضي وسالي
ما توقف الدنيا على شي مرغوب
ان كان غالي ترى دوم غالي
أَصبر على ماصار والشي مكتوب
امر العزيز يلي عليه اتكالي
سالم عبيد الكعبي
بعض الحقايق صعب نخفيها..
شروى البدر في هادي الليل..
خص التي بالشوق نرويها..
تسمو عليها الروح وتميل..
“….” غرام الروح واعنيها..
اعذب حقيقه يت هالجيل..
ربي حباها بكل ما فيها..
طيب وغنج وشي ما قيل..
ود الذي للزين يعنيها..
يرسل خفوقي بكل تعجيل..
دام القريحه يات تبغيعا..
هذي حقيقه دون تمثيل..
صدق الحقايق صعب نخفيها..
شروى البدر في هادي الليل..
سالم عبيد الكعبي
نضطر الى ترك من نحب ونعشق بسبب ضروف الحياة، إلا ان هناك مشاعر تأبى ان تتوافق مع هذي الضروف، مما تسبب الم في اشتياق من نحب.
احبك عشق وحبي لك خيالي
واحبك موت يا عمري وسنيني
يمر اسمك على فكري وبالي
يزيد الشوق فيني والحنيني
تباعدنا وحال البعد طالي
ولا لي بالبعد اية معيني
على الفراق مالي احتمالي
ظروف الحال تاتي وتعميني.
انا…
أبيات مبعثره 